Januzaj me rol të ri në përfaqësuesen e Belgjikës

Përzgjedhësi i Belgjikës, Marc Wilmots, ka treguar se i ka kërkuar Adnan Januzajt të luajë krejtësisht rol ndryshe në krahasim me atë që bën te Manchester United.

Anësori është në detyrë me përfaqësuesen belge këtë javë në takimin kundër Uellsit për eliminatoret për Euro 2016, transmeton Koha.

“E kam parë që në dy ndeshjet e fundit ai ka luajtur në krah me Antonio Valencian. Van Gaal ka kërkuar nga ai që të qëndrojë sa më anash, por unë kërkoj krejtësisht të kundërtën, dua që ai të hyjë brenda”, ka thënë Wilmots.

“Dua që ai nga ana e djathtë të luajë me këmbën e majtë, të pasojë ose të gjuajë në gol”, ka shtuar përzgjedhësi belg.

Belgjika mbrëmë fitoi 3-1 në një miqësore të zhvilluar përballë Islandë, me Januzaj që ishte në 11-shen startuese.