De Biasi i përgjigjet Alban Mehës

Gianni De Biasi ka sqaruar edhe një herë pse nuk e ka ftuar në Kombëtaren shqiptare Alban Mehën, për dy ndeshjet e radhës miqësore ndaj Francës dhe Italisë.

Selektori i Shqipërisë, Gianni de Biasi, ka treguar arsyeje pse nuk e ka ftuar në ekipi Alban Mehën, për dy ndeshjet miqësore ndaj Francës dhe Italisë.

Mesfushori kosovar ka mbetur i habitur nga vendimi i italianit, derisa edhe skuadra e Paderbornit është befasuar se si futbollisti i tyre ka mbetur jashtë ekipit, pasi tani gëzon formë të mirë.

”Kur kanë kaluar 11 ndeshje nga kampionati Gjerman, Meha nuk ka luajtur në 5 të parat, ndërsa në të gjashtën u aktivizua vetëm 12 minuta. Kur e grumbullova për Danimarkën dhe Serbinë e kuptova që nuk ishte në kondicionin e duhur fizik”, ka deklaruar De Biasi.

“Tani po luan në vazhdimësi dhe ka shënuar një gol por nuk besoj se është në gjendje të mirë me vetëm 150 minuta aktivizim. Meqë këto janë dy miqësore mendova për të mirën e klubit, lojtarit dhe kombëtares por dikush te Paderborn është ankuar. Gjithsesi ky është problemi i tyre”, theksoi ai.