Ushqimet më të kërkuara të vitit në Google

Google ka shpalosur listën vjetore me fjalët më të kërkuara në botë dhe përpos Robin Williamsit dhe ebolas që ishin në krye të saj, miliona njerëz në gjigantin teknologjik kanë kërkuar ushqime të ndryshme.

Rrjeti më i madh i kërkimeve ka bërë të ditur disa nga fjalët më të kërkuara sa i përket ushqimeve dhe pijeve, por edhe se çfarë ka ndryshuar në shijet e njerëzve.

Pica ishte fjala më e kërkuar nga ushqimet për vitin 2014, me më shumë kërkime se Kupa e Botës, ndërsa njerëzit më shumë kanë kërkuar ushqimet kineze në krahasim me ato franceze dhe indiane.

Karakteristikë është se në Japoni ushqimi francez ka qenë më i kërkuar sesa nga vetë francezët dhe se ushqimi djegës indian është kërkuar më shumë nga britanikët sesa nga indianët.

Sa i përket gatitjes së ushqimit, Google thotë që njerëzit janë bërë më “përtacë” sepse kanë kërkuar më shumë fjalën Restorant sesa Recetë.

Budweiser, Corona dhe Keystone janë në krye të listës sa i përket birrave më të kërkuara sivjet.

Tek koktejet, ato me fruta janë dominuese. Margarita, Sangria, Mojito dhe Mimosa kanë qenë koktejet më të kërkuara gjatë vitit 2014.